Importet e drithërave në sasi shënuan rënie me rreth 10% në 6-mujorin e parë të vitit 2022. Sipas të dhënave të INSTAT në gjysmën e parë të vitit janë importuar 119 mijë ton drithëra nga rreth 132 mijë tonë në të njëjtën periudhe të vitit 2020 ose rreth 13 tonë me pak.
Burimet nga tregu pohuan se, grosistët kufizuan blerjet për shkak të çmimeve të larta në pritje të korrjeve të reja të korrikut. Në pjesën më të madhe të globit gruri korret gjatë muajit korrik dhe çmimet kanë nisur rënien për shkak të prodhimit të ri. Një ton grurë në tregjet ndërkombëtare po shitet me 808 USD në bursa prej çmimit rekord 1350 USd për tonë që arriti në mars, pasi nisi lufta në Ukrainë.
Grosistët shpjeguan se, menjëherë pas fillimit të luftës, konsumatorët nxituan të blejnë sasi të larta të miellit në kushtet e panikut se furnizimet mund të dëmtoheshin nga lufta. Pas super blerjeve të marsit konsumi i miellit ka pësuar rënie dhe kjo u ka lënë kohë importuesve që të presin korrjet e reja të grurit në mënyrë që të sigurojnë furnizime me çmime ë të lira.
Aktualisht çmimet e grurit në tregjet ndërkombëtarë janë në nivelet më të larta që nga kriza e vitit 2008. Presionet janë rritur për shkak të rënies së rendimentit në disa zona të globit dhe shqetësimeve që ka krijuar lufta në Ukrainë.
Sipas Organizatës Botërore të Ushqimit (FAO) prodhimi global i grurit në vitin 2022 parashikohet të bjerë nga niveli rekord i vitit 2021 me 0.8%, duke arritur në 771 milionë tonë dhe duke shënuar rënien e parë në katër vjet. Rënia e prodhimit nga viti në vit në Australi, Indi, Marok dhe Ukrainë pritet të kompensohet nga rritja të pritshme në Kanada, Iran dhe Federatën Ruse.
Nga ana tjetër konsumi botëror ushqimor i grurit parashikohet të zgjerohet, megjithëse me një ritëm nën mesataren, pasi rritja e çmimeve po ndikon negativisht në përdorimin e grurit industrial. FAO parashikon se shfrytëzimi total i grurit në 2022-2023 do të jetë në 769 milionë tonë ose rreth 1.1% nën tendencën 10-vjeçare.
Rezervat botërore të grurit pritet të rriten me 0.4%, në 298 milionë tonë deri në mbylljen e stinëve në vitin 2023, parashikon FAO. Rritja e rezervave parashikohet të jetë e përqendruar në Kinë, Federatën Ruse dhe Ukrainë.
Shumica e importueseve shqiptare kanë zhvendosur importin e grurit nga Rusia drejt shteteve të tjera, por kryesisht në Serbi.
Në 6- mujorin e parë 2022 u importua nga Rusia 27 % të sasisë totale të grurit. Importet e grurit nga Rusia në gjysmën e parë të vitit kanë shënuar rënie me 35 % në raport me vitin e kaluar por ato kishin një pozicion të rëndësishëm në importet totale të drithërave me 27%, nga rreth 40% që ishin vitin e kaluar./monitor
